2026 жылғы 20 наурыз күні Мирас университетінде Ұлыстың ұлы күні — Наурыз мейрамына арналған «Қош келдің, әз Наурыз!» атты мерекелік концерт ұйымдастырылып өткізілді.
Іс-шараның негізгі мақсаты — ұлттық салт-дәстүрлерді дәріптеу, студенттер мен оқытушылар арасында бірлік пен ынтымақтастықты нығайту, сондай-ақ қазақ халқының мәдени мұрасын насихаттау болды.
Мерекелік кешті жүргізушілер ашып, Наурыз мейрамының мәні мен маңызына тоқталып, келген қонақтарды құттықтады. Іс-шара барысында оқытушылар сахнаға шақырылып, жылы лебіздері мен тілектерін білдірді.
Мерекенің шымылдығы қазақтың дәстүрлі «шашу» рәсімімен ашылып, көрермендерге көтеріңкі көңіл-күй сыйлады. Концерттік бағдарлама аясында студенттер орындауында әндер шырқалып, көркем сөз оқылып, музыкалық және шығармашылық нөмірлер ұсынылды.
Сонымен қатар, «Тұсау кесер» дәстүрі сахналық қойылым арқылы көрсетіліп, ұлттық құндылықтар кеңінен насихатталды.
Іс-шара барысында «Наурызды білесің бе?» атты интеллектуалды сайыс ұйымдастырылып, қатысушылардың білімдері сыналды. Белсенділік танытқан қатысушылар арнайы сыйлықтармен марапатталды.
Концерт соңында үлкендердің батасы беріліп, мерекелік кеш ұлттық дәстүрге сай қорытындыланды.
Сонымен қатар, мерекенің жалғасы ретінде ұлттық ойындар ұйымдастырылды. Қатысушылар қол күрес, арқан тартыс және дойбы ойындарына белсене қатысып, өз бақтарын сынады.
Мерекелік концерт жоғары деңгейде ұйымдастырылып, қатысушылар мен көрермендерге ерекше әсер қалдырды. Наурыз мейрамы аясында ұлттық рух жаңғырып, бірлік пен татулықтың маңызы тағы да айқын көрініс тапты.
